Dhule,Maharashtra,India

लाचखोर शिक्षणाधिकारी नाशिक एसीबीच्या ताब्यात

जुनी पेन्शन देण्यासाठी मागितले होते दोन लाख

धुळे : जुनी शासकीय पेन्शन योजना लागू करून देण्याच्या मोबदल्यात २ लाख रुपयांची लाच मागितल्याप्रकरणी जिल्हा परिषद धुळे येथे उपशिक्षणाधिकारी (प्राथमिक) तसेच प्रभारी प्राथमिक शिक्षणाधिकारी पदावर कार्यरत असलेले चंद्रकांत दौलत पाटील (वय ४१) यांना नाशिक येथील लाचलुचपत प्रतिबंधक विभागाच्या पथकाने ताब्यात घेतले आहे.

ही कारवाई रविवार (दि.२८) धुळे शहरातील मालेगाव रोडवरील डी- मार्ट परिसरात करण्यात आली.

चंद्रकांत पाटील हे यापूर्वी मालेगाव महापालिकेच्या शिक्षण विभागात प्रशासनाधिकारी म्हणून कार्यरत होते. जुनी पेन्शन योजना लागू करून देण्यासाठी लाच मागितल्याची तक्रार प्राप्त झाल्यानंतर एसीबी नाशिक पथकाने त्यांच्यावर सापळा कारवाई केली. ताब्यात घेतल्यानंतर पथक त्यांना पुढील कारवाईसाठी रवाना झाले आहे. या प्रकरणी मालेगाव येथील पवारवाडी पोलीस ठाण्यात गुन्हा दाखल करण्यात आला असून तपास सुरू आहे.

यासंदर्भात सूत्रांनी दिलेल्या माहितीनुसार तक्रारदार हे २४ नोव्हेंबर २००५ पासून शिक्षक म्हणून सेवेत आहेत. त्यांची भरती प्रक्रिया ऑक्टोबर २००५ पूर्वी जाहीर झालेल्या जाहिरातीवर आधारित असल्याने उच्च न्यायालयाच्या नागपूर खंडपीठाच्या निर्णयानुसार त्यांना जुनी शासकीय पेन्शन योजना लागू होण्याचा अधिकार आहे. त्या अनुषंगाने महाराष्ट्र शासनाने संबंधित शासन निर्णयही निर्गमित केला आहे. या निर्णयाच्या आधारे तक्रारदार व इतर शिक्षकांनी २१ फेब्रुवारी २०२४ रोजी मालेगाव महापालिकेच्या शिक्षण विभागाकडे जुनी पेन्शन योजना लागू करण्यासाठी अर्ज सादर केला होता.

जुनी पेन्शन योजना लागू करून देणे तसेच संबंधित शिक्षकांचे जीपीएफ खाते उघडण्यासाठी आवश्यक टिपण्णी व प्रस्ताव तयार करून आयुक्तांकडे सादर करण्याच्या मोबदल्यात चंद्रकांत पाटील यांनी प्रति शिक्षक १० हजार रुपये याप्रमाणे एकूण २ लाख रुपयांची लाच मागितल्याचा आरोप आहे. याबाबत तक्रारदाराने ७ ऑगस्ट २०२५ रोजी लाचलुचपत प्रतिबंधक विभाग, नाशिक येथे लेखी तक्रार दाखल केली होती.

तक्रारीची पडताळणी केल्यानंतर एसीबी नाशिक पथकाने त्यांचे लोकेशन ट्रॅक केले असता ते धुळे येथील मालेगाव रोडवरील डी- मार्ट परिसरात आढळून आले. त्यानुसार तेथेच त्यांना ताब्यात घेण्यात आले.

या प्रकरणी त्यांच्याविरुद्ध भ्रष्टाचार प्रतिबंधक अधिनियम, १९८८ मधील कलम ७ अंतर्गत गुन्हा दाखल करण्यात आला आहे. ही कारवाई सापळा अधिकारी पोलीस उपअधीक्षक सुरेश शिरसाठ यांच्या नेतृत्वाखाली हवालदार विनोद चौधरी, दीपक पवार, पोलीस अंमलदार संजय ठाकरे व योगेश शिंदे यांनी केली. या कारवाईसाठी पोलीस अधीक्षक भारत तांगडे, अपर पोलीस अधीक्षक माधव रेड्डी तसेच एसीबी नाशिक परिक्षेत्राचे अपर पोलीस अधीक्षक सुनील दोरगे यांचे मार्गदर्शन लाभले.

या कारवाईमुळे शिक्षण विभागात खळबळ उडाली असून, जुनी पेन्शन योजना लागू करण्याच्या प्रक्रियेत सुरू असलेल्या गैरप्रकारांवर एसीबीने लक्ष केंद्रीत केल्याचे स्पष्ट झाले आहे. पेन्शनसारख्या संवेदनशील आणि हक्काच्या बाबींसाठी लाच मागितली जात असल्याने शिक्षक वर्गात तीव्र संताप व्यक्त होत आहे. दरम्यान, या प्रकरणाचा तपास पुढील टप्प्यात विस्तारण्यात येणार असून, इतर कोणत्याही अधिकाऱ्यांचा किंवा मध्यस्थांचा सहभाग आहे का, याचीही सखोल चौकशी करण्यात येणार असल्याची माहिती सूत्रांनी दिली आहे.