Satara,Maharashtra,India

जनगणनेचे काम करणाऱ्या शिक्षकाला मारहाण

सातारा, लोणंद : लोणंद पोलीस स्टेशनहद्दीत शासकीय जनगणना व दुकान गणनेचे काम करीत असताना एका प्राथमिक शिक्षकावर शिवीगाळ, दमदाटी व मारहाण केल्याची गंभीर घटना घडली.

या प्रकरणी संबंधित संशयित आरोपीविरोधात विविध कलमान्वये गुन्हा दाखल करण्यात आला आहे. पोलिसांनी तातडीने कारवाई करत संशयीत आरोपीस अटक केली आहे.

याबाबत लोणंद पोलीस स्टेशनवरुन मिळालेली अधिक सविस्तर माहिती अशी की, दि. २४ मे रोजी सायंकाळी ७.०० ते ७.३० वाजण्याच्या सुमारास सुखेड (ता. खंडाळा) येथील गावांतर्गत रस्त्यावर, खंडाळा रोडकडे जाणाऱ्या मार्गावरील जय मल्हार चिकन सेंटर समोर हा प्रकार घडला. फिर्यादी राजेंद्र दशरथ पिसाळ (वय ५२ वर्षे, व्यवसाय प्राथमिक शिक्षक, रा. होळ ता. फलटण) हे शासनाकडून नेमून दिलेले राष्ट्रीय जनगणना व दुकान गणनेचे अधिकृत काम करीत होते. दरम्यान, दीपक कुंडलीक धायगुडे (रा. सुखेड ता. खंडाळा) याने फिर्यादीकडे येऊन त्यांना शिवीगाळ करत दमदाटी केली.

यानंतर हाताने लाथाबुक्क्यांनी मारहाण करून फिर्यादीस शासकीय कर्तव्य बजावण्यापासून रोखले व कामात अडथळा निर्माण केला, असे तक्रारीत नमूद आहे. या घटनेमुळे शासकीय कामात अडथळा निर्माण होऊन परिसरात काही काळ तणावाचे बातावरण निर्माण झाले होते. या प्रकरणी लोणंद पोलीस ठाण्यात गुन्हा दाखल केला आहे. संशयित आरोपी दीपक कुंडलिक धायगुडे यास अटक करण्यात आली आहे. या गुन्ह्याचा तपास सपोनि शिवाजी जायपत्रे यांच्या मार्गदर्शनाखाली पोहवा टेकवडे हे करीत आहेत.