Sindhudurg,Maharashtra,India

जि. प शिक्षिका झेंडावंदन करून अचानक बेपत्ता

कोल्हापूरमध्ये 8 वर्षांचा मुलगा बघतोय आईची वाट

सिंधुदुर्ग : कोल्हापूर जिल्ह्यातील रहिवासी असलेली पूजा अनिल पोवार या शिक्षिका सध्या सिंधुदुर्ग जिल्ह्यातील वैभववाडी तालुक्यात कामानिमित्त राहत होत्या. 1 मे रोजी महाराष्ट्र दिनानिमित्त शाळेत ध्वजारोहण कार्यक्रमासाठी त्या गेल्यानंतर अचानक बेपत्ता झाल्याची घटना समोर आली आहे.

या घटनेमुळे त्यांच्या कुटुंबीयांमध्ये चिंतेचे वातावरण निर्माण झाले असून, विशेषतः पती अनिल पोवार आणि 8 वर्षांचा मुलगा मोठ्या मानसिक तणावाखाली आहेत.

पूजा पोवार वैभववाडीतील जिल्हा परिषद शाळा, सोनाळी चव्हाणवाडी येथे सेवेत होत्या. नेहमीप्रमाणे त्या 1 मे रोजी शाळेत कार्यक्रमासाठी गेल्या, मात्र त्यानंतर त्या घरी परतल्याच नाहीत.

सुरुवातीला उशीर झाला असेल असे समजून कुटुंबीयांनी प्रतीक्षा केली, पण बराच वेळ उलटूनही त्यांचा काहीच संपर्क झाला नाही. त्यानंतर त्यांच्या पतीने स्वतःहून शोध घेण्यास सुरुवात केली. नातेवाईक, मित्रमंडळी आणि ओळखीच्या सर्व ठिकाणी चौकशी करूनही कोणतीही ठोस माहिती मिळाली नाही.

शेवटी 2 मे रोजी अनिल पोवार यांनी वैभववाडी पोलीस ठाण्यात अधिकृत तक्रार नोंदवली. पोलिसांनी तत्काळ शोधमोहीम सुरू केली असून, परिसरातील सीसीटीव्ही फुटेज, मोबाईल लोकेशन आणि संपर्कातील व्यक्तींची माहिती तपासली जात आहे. पोलिसांना एका संबंधित व्यक्तीचा मोबाईल बंद असल्याची माहिती मिळाली असून, या घटनेत काही संशयास्पद बाबी असण्याची शक्यता नाकारता येत नाही.

या प्रकरणात पोलिसांनी फोटो शेअर करत नागरिकांना आवाहन केले आहे की, पूजा पोवार यांच्याबाबत कोणतीही माहिती मिळाल्यास त्वरित पोलीस ठाण्याशी संपर्क साधावा. दरम्यान, त्यांच्या कुटुंबीयांशी व नातेवाईकांशी सतत संपर्क ठेवून अधिक माहिती गोळा केली जात आहे. या प्रकरणाचा तपास सहाय्यक पोलीस निरीक्षक सोनाळकर यांच्या मार्गदर्शनाखाली सुरू आहे.

पूजा पोवार यांचा जीवनप्रवासही प्रेरणादायी

लहानपणी वडिलांचे छत्र हरवल्यानंतर त्यांनी आईच्या आधारावर शिक्षण पूर्ण केले. डीएड केल्यानंतर व लग्नानंतरही त्यांनी शिक्षण सुरू ठेवले आणि एमपीएससीद्वारे अधिकारी होण्याचे ध्येय ठेवले होते. कुटुंबाची जबाबदारी सांभाळत त्यांनी शिक्षक म्हणून काम सुरू केले होते. त्यांच्या अचानक बेपत्ता होण्याने केवळ कुटुंबीय नव्हे तर संपूर्ण परिसरात चिंता आणि हळहळ व्यक्त होत आहे.