Amaravati,Maharashtra,India

राज्यातील शिक्षकांना कुत्र्यांच्या व्यवस्थापनाचे आदेश

अमरावतीः भटक्या कुत्र्यांपासून जनतेची सुरक्षा व्हावी म्हणून सर्वोच्च न्यायालयाने ७ नोव्हेंबर २०२५ रोजी भटक्या कुत्र्यांच्या बंदोबस्तासाठी उपाययोजना करण्याचे सुस्पष्ट आदेश दिले. त्या नुसार दिल्ली सरकारचा कित्ता गिरवत आता महाराष्ट्र शासनाने व शिक्षण संचालनालयाने या महत्वपूर्ण कामांसाठी सरकारी शिक्षक असो की, खासगी शिक्षक. त्यांना भटक्या कुत्र्याच्या मागे 'पाळत' ठेवण्यासाठी आदेश दिले आहेत.

यामुळे नोकरी वाचविण्यासाठी शिक्षक आता कुत्रा चावो की रेबीज होऊन 'धारातीर्थी पडो, मात्र भटक्या कुत्र्यांच्या मागे आता शिक्षक लागल्याचे चित्र दिसणार आहे आणि कुत्र्यांवर लळा लावणारे 'चिमुकले' विद्यार्थी हे गुरूजींचे काय चाललेय म्हणून नक्की गोंधळून जाणार आहेत.

कुठे, कुठे कुत्रे फिरतात? ते कुठे जमा होतात? ते संख्येने अधिक कुठे गोळा होतात? ते का गोळा होतात.. याचे संशोधनच नव्हे तर चक्क निरीक्षण ठेवून शासन दफ्तरी कळवावे, असे त्याचे स्वरूप आहे. याचा विषय देखील मजेशीर असून तो 'भटक्या कुत्र्यांचे व्यवस्थापन, नियमित देखरेख व तपासणी' असा आहे. या कामी शाळेतील एक शिक्षक नोडल अधिकारी म्हणून नेमायचा असून त्याचे नाव व संपर्क क्रमांक शाळेच्या दर्शनी भागात लावायचा आहे.

कुत्रे चावतात म्हणून 'रेबीज' होतो. लोक बहूसंख्येने मृत्युमुखी पडतात, मुले असुरक्षित होतात आणि अशा कुत्र्यांवर लक्ष ठेवणे, त्यांच्या मागावर जाणे, त्यांची संख्या मोजणे, कोणत्या परिसरात ते अधिक प्रमाणात मिळून येतात याची इत्यंभूत माहिती प्रत्यक्ष चौकीदारी करून शिक्षकांना करण्याची खास तंबी शिक्षण संचालनालयाने व महाराष्ट्र शासनाने गुरूजींना दिली आहे.

शासनाचे आदेश अनाकलनीय : महेश ठाकरे

*“प्राणीमात्रांवर दया करण्याचे धडे मुलांना देणारे गुरूजी जेव्हा भटके कुत्रे पकडून, त्यांना त्या त्या परिसरातून उचलून नजरे आड करून तो परिसर कुत्रे विरहित करण्याच्या कामाच्या नोंदी नगर पालिका, महापालिका, जिल्हा परिषद, खासगी संस्थाचालकांना दररोज शाळेत, शालेय परिसरातून देत राहतील तर चिमुकल्यांनी नेमके शिक्षकांची कोणती भूमिका स्वीकारावी व त्याचे अनुकरण करावे? भटक्या कुत्र्यांच्या मागे शिक्षक, हे शासनाचे, शिक्षण संचालनाचे व सरकारच्या आदेशाचे 'कवित्व' लहानग्या विद्यार्थ्यांच्या आकलना पलिकडचे आहे,” अशी प्रतिक्रिया प्रहार संघटनेचे महेश ठाकरे यांनी व्यक्त केली आहे.