Nasik,Maharashtra,India

जिल्हा परिषद शाळेची विक्री!

नाशिकच्या विंचुर मधील घटना

नाशिक : निफाड तालुक्यातील विंचूर येथील जिल्हा परिषद प्राथमिक शाळा असलेली गट नं. ६२७ जागा बनावट कागदपत्रांच्या आधारे परस्पर विक्री करण्यात आल्याने तणाव निर्माण झाला आहे. गुजरात राज्यात तयार केलेल्या मुखत्यारपत्राच्या माध्यमातून विंचूर येथील शाळेची बनावट कागदपत्रांच्या आधारे विक्री झाल्याची तक्रार करण्यात आली आहे.

यामुळे शाळेचे विद्यार्थी, पालक, ग्रामस्थ आक्रमक झाले. नाशिक- छत्रपती संभाजीनगर मार्गावर आंदोलन करण्यात आले.

यावेळी घोषणाबाजी करुन परिसर दणाणून सोडण्यात आला. संबंधित व्यवहाराची नोंद रद्द होईपर्यंत आंदोलन मागे घेणार नसल्याची भूमिका आंदोलनकर्त्यांनी घेतली. आंदोलनामुळे काही काळ वाहतूक विस्कळीत झाली. प्रशासनाच्या लेखी आश्वासनानंतर आंदोलन स्थगित करण्यात आले.

विंचूर येथील जिल्हा परिषद प्राथमिक शाळा ही गावातील गरीब व होतकरू विद्यार्थ्यांच्या शिक्षणाचा मजबूत पाया आहे. मागील १०० वर्षापासून या ठिकाणी शाळा सुरू आहे. शाळा बनावट कागदपत्रांच्या आधारे परस्पर विक्री केल्याच्या प्रकारामुळे परिसरात तणाव निर्माण झाला. संबंधित खरेदीदाराने शाळेच्या जागेवर सोयाबीन पिकाची लागवड केल्याची नोंद शासन दरबारी केल्याची माहिती उघड झाली आहे. या प्रकाराविरोधात शाळेचे विद्यार्थी, पालक आणि स्थानिक नागरिक आक्रमक झाले. गुरूवारी नाशिक- छत्रपती संभाजीनगर राज्य मार्गावर रास्ता रोको आंदोलन करण्यात आले.

दरम्यान, मंत्री छगन भुजबळ यांनी या प्रकरणाची दखल घेत जिल्हाधिकारी आणि प्रांत अधिकाऱ्यांना संबंधित नोंद रद्द करण्याचे आदेश दिले. तसेच त्यांनी आंदोलनकर्त्यांशी दूरध्वनीद्वारे संवाद साधला. भुजबळ यांच्या हस्तक्षेपानंतर जिल्हा परिषद शाळेतील विद्यार्थ्यांना आंदोलनातून परत शाळेत पाठविण्यात आले. मात्र, संबंधित नोंद अधिकृतरीत्या रद्द होत नाही, तोपर्यंत रस्त्यावरून हटणार नसल्याचा निर्णय आंदोलनकर्त्यांनी कायम ठेवल्याने तणावाचे वातावरण निर्माण झाले. त्याबाबत नोंदी रद्द करत लेखी दिल्यानंतर आंदोलन स्थगित झाले. आंदोलनात सचिन दरेकर, भैय्यासाहेब देशमुख, निलेश सालकाढे, राजेंद्र पाटील, ज्ञानेश्वर पवार आदी उपस्थित होते. कुठलाही अनुचित प्रकार घडू नये या करता लासलगाव पोलीस ठाण्याचे पोलीस अधिकारी भास्कर शिंदे व त्यांचे सहकारी आंदोलनस्थळी उपस्थित होते.