Mumbai,Maharashtra,India

शिक्षकांना पगार कपातीची शिक्षा

आंदोलनात सहभागी शिक्षकांची माहिती घेण्याचे काम सुरू

मुंबई : राज्यव्यापी शाळाबंद आंदोलनात सहभागी झालेल्या शिक्षकांविरोधात शालेय शिक्षण विभागाने कारवाईची तयारी सुरू केली असून, आंदोलनात सहभागी झालेल्या शिक्षकांचे एका दिवसाचे वेतन कापण्याची शक्यता व्यक्त होत आहे. 

९ जुलै रोजी विविध शिक्षक संघटनांच्या संयुक्त विद्यमाने राज्यभर 'शाळाबंद' आंदोलन करण्यात आले होते. मुंबईतील आझाद मैदानावर झालेल्या मुख्य आंदोलनात शिक्षकांची मोठ्या प्रमाणावर उपस्थिती होती. शिक्षक संघटनांच्या दाव्यानुसार या आंदोलनात ५ हजारांहून अधिक शिक्षक सहभागी झाले होते. राज्यातील विविध जिल्ह्यांमध्येही निदर्शने झाली असून, आंदोलनामुळे  सरकारी व अनुदानित शाळांमधील अध्यापनावर परिणाम झाल्याचे सांगितले जात आहे.

आंदोलनापूर्वीच शिक्षण संचालनालयाने आंदोलनात सहभागी होणाऱ्या शिक्षकांचे वेतन कापण्याचा इशारा दिला होता. तसेच विभागीय शिक्षण उपसंचालक, जिल्हा शिक्षणाधिकारी आणि मुंबईतील शिक्षण निरीक्षकांना आंदोलनात सहभागी शिक्षकांची माहिती संकलित करण्याचे निर्देश देण्यात आले होते. या माहितीच्या आधारे संबंधित शिक्षकांवर एका दिवसाचे वेतन कपातीची कारवाई होण्याची शक्यता आहे.

मात्र, या इशाऱ्यानंतरही अनेक शिक्षकांनी "वेतन कापले तरी माघार नाही" अशी भूमिका घेत आंदोलनात सहभाग घेतला. शिक्षक संघटनांनी आपल्या विविध मागण्यांसाठी आझाद मैदानावर धडक मोर्चा काढला.

या आंदोलनाला विरोधी पक्षातील काही नेत्यांनी, त्यात आमदार रोहित पवार यांच्यासह इतर लोकप्रतिनिधींनीही समर्थन दर्शविले होते.

दरम्यान, आंदोलनात सहभागी शिक्षकांवरील संभाव्य वेतन कपातीच्या निर्णयामुळे शिक्षक संघटना आणि शिक्षण विभाग यांच्यातील वाद आणखी तीव्र होण्याची चिन्हे दिसत आहेत.