Satara,Maharashtra,India

सीटीईटी परीक्षार्थी शिक्षकांना निवडणूक कामातून दिलासा

शिक्षक समन्वय समितीच्या शिष्टमंडळाची तहसीलदार व निवासी जिल्हाधिकाऱ्यांशी भेट

सातारा : निवडणूक प्रक्रियेचे आदेश आणि सीटीईटी पात्रता परीक्षा एकाच दिवशी आल्याने अनेक शिक्षक परीक्षेला मुकण्याची शक्यता निर्माण झाली होती. या पार्श्वभूमीवर शिक्षकांना न्याय मिळावा आणि परीक्षेला वंचित राहावे लागू नये, यासाठी शिक्षक समन्वय समिती, सातारा तालुका यांच्या संयुक्त विद्यमाने तहसीलदार समीर यादव तसेच निवासी जिल्हाधिकारी विक्रांत चव्हाण यांची भेट घेण्यात आली. 

या भेटीत शिक्षकांच्या अडचणी प्रशासनाच्या निदर्शनास आणून देण्यात आल्या. सीटीईटी ही शिक्षकांसाठी अत्यंत महत्त्वाची पात्रता परीक्षा असून निवडणूक आदेशांमुळे परीक्षा देणे अशक्य होऊ नये, अशी ठाम भूमिका शिक्षक संघटनांनी मांडली.

प्रशासनाने परिस्थितीची गांभीर्याने दखल घेत सहानुभूतीपूर्ण विचार करण्याचे आश्वासन दिले. BLO ची ऑर्डर असणारे शिक्षक तसेच जे शिक्षक सीटीईटी परीक्षेसाठी बसलेले आहेत आणि ज्यांची परीक्षा ७ व ८ तारखेला आहे, अशा शिक्षकांचे त्या दिवसासाठी निवडणुकीचे आदेश रद्द करून त्यांना परीक्षेला उपस्थित राहण्याची संधी देण्यात येईल, असे स्पष्ट करण्यात आले. या संदर्भात प्रशासनाकडून संबंधित शिक्षकांची माहिती तातडीने गोळा करण्यात येणार असून, एका वेळी दोन्ही जबाबदाऱ्या असलेल्या शिक्षकांना निवडणूक कामातून मुक्त करण्याची प्रक्रिया तत्काळ राबवली जाईल, असेही सांगण्यात आले.

या बैठकीसाठी तब्बल ७० शिक्षक तहसील कार्यालय, सातारा येथे उपस्थित होते. शिक्षकांनी तहसीलदारांना निवेदन सादर करून आपली समस्या मांडली. यावेळी सातारा तालुका शिक्षक संघाचे अध्यक्ष मनोहर माने, सातारा जिल्हा शिक्षक संघाचे कार्यकारी अध्यक्ष तथा आवाज शिक्षकांचा चे जिल्हा प्रतिनिधी हनमंत रसाळ, सातारा तालुका प्राथमिक शिक्षक समितीचे अध्यक्ष तातोबा भिसे,  तसेच रवींद्र कुंभार, अमर वंजारी, तानाजी सराटे यांच्यासह बहुसंख्य शिक्षक मोठ्या संख्येने उपस्थित होते. 

तहसीलदार समीर यादव आणि उपजिल्हाधिकारी महसूल विक्रांत चव्हाण यांनी विषयाचे गांभीर्य ओळखून आजच परीक्षार्थी शिक्षकांची यादी तयार करण्याचे आदेश दिले. तसेच जे शिक्षक परीक्षेला बसणार नाहीत, मात्र त्यांच्याकडे निवडणुकीचे आदेश नाहीत, अशा शिक्षकांच्या ठिकाणी योग्य ते आदेश काढून नियोजन करण्यात येईल, असेही प्रशासनाने स्पष्ट केले.

या निर्णयामुळे सीटीईटी परीक्षार्थी शिक्षकांमध्ये समाधान व्यक्त करण्यात येत असून शिक्षक संघटनांनी प्रशासनाच्या सकारात्मक भूमिकेचे स्वागत केले आहे.