Satara,Maharashtra,India

शिक्षक दिनी काळ्या फिती लावून काम करण्याचा निर्णय,

‘क्लासरूम मॉनिटरिंग’ उपक्रमाला शिक्षक समन्वय समितीचा विरोध

सांगली : मुख्य कार्यकारी अधिकारी, जिल्हा परिषद, सांगली यांच्या संकल्पनेतून जिल्ह्यातील शाळांमध्ये ऑनलाइन वर्ग सुरू करण्याचा उपक्रम राबविण्यात येणार आहे. या पार्श्वभूमीवर प्रत्येक शाळेतील शिक्षकांसाठी संनियंत्रण अधिकारी अथवा कर्मचाऱ्यांची नियुक्ती करण्यात आली असून, शिक्षकांनी दिलेल्या Zoom लिंकद्वारे ऑनलाइन वर्गात सहभागी होऊन विद्यार्थ्यांचे अध्यापन करावे, अशा सूचना देण्यात आल्या आहेत. हा उपक्रम नियमितपणे दररोज सकाळी ११ ते सायंकाळी ५ वाजेपर्यंत सुरू राहणार आहे.

दरम्यान, सक्षम प्रशासकीय यंत्रणा कार्यरत असताना शिक्षकांवर अविश्वास दाखविणारा ‘क्लासरूम मॉनिटरिंग’ उपक्रम राबविण्यात येत असल्याचा आरोप करत सांगली जिल्हा शिक्षक समन्वय समितीने या उपक्रमाला विरोध दर्शविला आहे. जिल्ह्यातील शाळांमधील विद्यार्थी शिष्यवृत्ती, गुणवत्ता शोध परीक्षा तसेच विविध शैक्षणिक उपक्रमांमध्ये उल्लेखनीय यश संपादन करीत असताना, विद्यार्थ्यांना घडविणाऱ्या शिक्षकांच्या कार्यक्षमतेवर अशा प्रकारे प्रश्नचिन्ह निर्माण करणे दुर्दैवी असल्याचे समितीने म्हटले आहे.

या पार्श्वभूमीवर नुकत्याच झालेल्या सांगली जिल्हा शिक्षक समन्वय समितीच्या ऑनलाइन बैठकीत या उपक्रमाचा निषेध करण्यात आला. तसेच ५ सप्टेंबर शिक्षक दिनी सर्व शिक्षकांनी काळ्या फिती लावून काम करावे, असा निर्णय घेण्यात आला आहे. जिल्ह्यातील सर्व शिक्षक बांधवांनी या उपक्रमात सहभागी होऊ नये, असे आवाहनही समितीने केले आहे.

सांगली जिल्हा शिक्षक समन्वय समितीचे अध्यक्ष  महेश सरनाथे, उपाध्यक्ष टी. के. जावीर, कार्याध्यक्ष डॉ. संतोष कदम, सहसचिव शशिकांत पाटील, प्रसिद्धिप्रमुख डॉ. चंद्रशेखर क्षीरसागर, उपाध्यक्ष दिवाणजी देशमुख, सरचिटणीस सदाशिव वारे आणि सल्लागार सुनील गुरव यांच्यासह विविध शिक्षक संघटनांचे प्रतिनिधी या भूमिकेत सहभागी आहेत.

ऑनलाइन अध्यापनाच्या माध्यमातून विद्यार्थ्यांचे शैक्षणिक नुकसान टाळण्याचा प्रशासनाचा प्रयत्न असला, तरी शिक्षकांवरील अविश्वासाची भावना निर्माण करणाऱ्या कोणत्याही प्रक्रियेला विरोध राहील, अशी भूमिका शिक्षक समन्वय समितीने घेतली आहे. त्यामुळे ऑनलाइन अध्यापनाची प्रशासकीय अंमलबजावणी आणि ‘क्लासरूम मॉनिटरिंग’विरोधातील शिक्षक संघटनांची भूमिका यामुळे सांगली जिल्ह्यातील शिक्षण क्षेत्रात येणाऱ्या काळात प्रशासन विरुद्ध शिक्षक संघटना असा नवा वाद निर्माण होण्याची शक्यता व्यक्त होत आहे.

काय आहे ‘क्लासरूम मॉनिटरिंग’ उपक्रम 

• शिक्षकांनी सकाळी ठीक ११ वाजता संनियंत्रण अधिकारी अथवा कर्मचाऱ्यांकडून प्राप्त झालेल्या Zoom लिंकवर सहभागी व्हावे. Zoom वर प्रवेश केल्यानंतर ऑडिओ म्यूट ठेवून व्हिडिओ सुरू ठेवावा. विद्यार्थ्यांसह फळा स्पष्टपणे दिसेल अशा योग्य ठिकाणी मोबाईल ठेवून अध्यापन करावे. 

• ऑनलाइन वर्गासाठी शिक्षकांनी मोबाईलची बॅटरी पूर्ण चार्ज ठेवणे, अनलिमिटेड इंटरनेट डेटा उपलब्ध करून घेणे तसेच Android मोबाईलमध्ये Zoom App पूर्वतयारीने डाउनलोड करून ठेवणे आवश्यक आहे. 

• Zoom ची मोफत लिंक ४५ मिनिटांसाठी उपलब्ध असल्याने लिंकचा कालावधी संपल्यानंतर सुमारे दोन मिनिटांनी त्याच लिंकवर शिक्षकांनी पुन्हा सहभागी व्हावे. 

• Zoom वर्गादरम्यान मुख्य कार्यकारी अधिकारी, शिक्षणाधिकारी, गटविकास अधिकारी तसेच गटशिक्षणाधिकारी यापैकी कोणतेही अधिकारी कोणत्याही वेळी ऑनलाइन वर्गात सहभागी होऊन अध्यापनाची पाहणी तसेच शिक्षकांशी संवाद साधू शकतात.