Satara,Maharashtra,India

हायवा ट्रकने घेतला जि.प. शिक्षिकेचा बळी

मुंबई : मुंबई- अहमदाबाद महामार्गावरील शिरसाड नाका येथे विरुद्ध दिशने जात असलेल्या हायवा ट्रकने महिला शिक्षिकेला चिरडल्याने त्यांचा जागीच मृत्यू झाल्याची दुर्दैवी घटना घडली आहे.

या घटनेने मोठी खळबळ उडाली आहे. समोर आलेल्या माहितीनुसार, तिल्हेर येथील मस्कर पाडा जिल्हा परिषद शाळेत ज्ञानदानाचे कार्य करणाऱ्या शिक्षिका स्वीडल गोम्स (वय 40, रा. निर्मळ) या आपल्या कर्तव्यावर जात असताना काळाने घाला घातला आहे. एका भरधाव हायवा ट्रकने त्यांना चिरडल्याने त्यांचा जागीच अंत झाला. महामार्गावर विरुद्ध दिशेने वाहन चालवण्याच्या घातक वृत्तीमुळे एका आदर्श शिक्षिकेचा बळी गेल्याने प्रशासनाच्या दुर्लक्षावर संताप व्यक्त केला जात आहे.

स्वीडल गोम्स या शनिवारी सकाळी मस्कर पाडा जिल्हा परिषद शाळेत जाण्यासाठी निघाल्या होत्या. शिरसाड नाका येथील बस स्टॉपवर जाण्यासाठी त्या रस्ता ओलांडत असताना शिरसाडकडून भामटपाडा गावाकडे विरुद्ध दिशेने जाणाऱ्या एका हायवा ट्रकने त्यांना मागून जोरदार धडक दिली. ही धडक इतकी भीषण होती की, ट्रकचे चाक त्यांच्या अंगावरून गेल्याने त्यांचा जागीच मृत्यू झाला. अपघाताचे भीषण दृश्य पाहून उपस्थित नागरिक सुन्न झाले.

तिल्हेर गावात शोककळा

अपघातानंतर चालक ट्रक सोडून फरार झाला आहे. मांडवी पोलिसांनी तातडीने घटनास्थळी धाव घेत मृतदेह शवविच्छेदनासाठी पाठवला. स्वीडल गोम्स यांच्या निधनाची बातमी शाळेत पोहोचताच विद्यार्थी आणि पालकांना अश्रू अनावर झाले. एक प्रेमळ आणि कर्तव्यदक्ष शिक्षिका गमावल्याने तिल्हेर गावात शोककळा पसरली आहे.

पोलीस आणि आरटीओ प्रशासनाचे दुर्लक्ष

हायवा ट्रक क्षमतेपेक्षा जास्त माल भरून वाहतूक करताना सर्वत्र दिसून येत आहेत . महामार्गावर वेगाची मर्यादा ओलांडणे आणि शॉर्टकटच्या नादात विरुद्ध दिशेने वाहन चालवणे हे प्रकार नित्याचे झाले आहेत. या अवजड वाहनांवर प्रशिक्षित चालक असतात का? याकडे पोलीस आणि आरटीओ प्रशासनाचे दुर्लक्ष होत असल्याचा आरोप नागरिक करत आहेत.