राष्ट्रीय स्तरावर निवड झालेल्या शाळांमध्ये श्री शिवाजीराव देसाई विद्यालय, सोनवडे, न्यू इंग्लिश स्कूल, गोकुळ धावडे आणि पाटण व्हॅली इंग्लिश मीडियम स्कूल, पाटण या शाळांचा समावेश आहे.

या उल्लेखनीय यशाबद्दल गटशिक्षणाधिकारी दीपा बोरकर यांनी समाधान व्यक्त करत सांगितले की, हे यश शिक्षण विभाग, केंद्रप्रमुख, मुख्याध्यापक, शिक्षक, विद्यार्थी आणि पालक यांच्या सामूहिक प्रयत्नांचे फलित आहे. तालुक्याचा शैक्षणिक दर्जा आणि पर्यावरणाबाबतची जागरूकता राष्ट्रीय स्तरावर सिद्ध करण्याच्या उद्देशाने अनेक महिन्यांपासून नियोजनबद्ध काम करण्यात आले. प्रत्येक शाळेत पिण्याच्या शुद्ध पाण्याची व्यवस्था, घनकचरा व्यवस्थापन, सांडपाणी प्रक्रिया, स्वच्छता आणि पर्यावरणपूरक उपक्रम प्रभावीपणे राबविण्यात आले.

या ऐतिहासिक यशाबद्दल सातारा जिल्ह्याचे पालकमंत्री तथा पर्यटन, खनिकर्म आणि माजी सैनिक कल्याण मंत्री ना. शंभूराज देसाई यांनी तिन्ही शाळांचे अभिनंदन करत ही कामगिरी संपूर्ण जिल्ह्यासाठी अभिमानास्पद असल्याचे सांगितले. पर्यावरण संवर्धनाचा संदेश देणारे हे यश इतर शाळांसाठी प्रेरणादायी ठरेल, असे त्यांनी नमूद केले.

पंचायत समितीचे उपसभापती विजय पवार यांनीही पाटण तालुक्याच्या या यशाचे कौतुक करत निसर्ग संवर्धन आणि स्वच्छतेबाबत तालुक्याने केलेले कार्य राष्ट्रीय स्तरावर पोहोचल्याचा आनंद व्यक्त केला. या यशाचे श्रेय त्यांनी गटशिक्षणाधिकारी दीपा बोरकर आणि त्यांच्या संपूर्ण टीमसह संबंधित शाळांचे मुख्याध्यापक, शिक्षक, शिक्षकेतर कर्मचारी, विद्यार्थी व पालकांना दिले.

या यशामागे सातारा जिल्हा परिषदेच्या मुख्य कार्यकारी अधिकारी याशनी नागराजन यांनी पर्यावरण, स्वच्छता आणि आरोग्य विषयांवर दिलेले विशेष मार्गदर्शन, प्राथमिक शिक्षणाधिकारी अनिस नायकवडी यांनी केलेले सातत्यपूर्ण मार्गदर्शन तसेच डायटचे वरिष्ठ अधिव्याख्याता व तालुका संपर्क प्रमुख डॉ. सतीश फरांदे यांचे मोलाचे सहकार्य लाभल्याचेही यावेळी सांगण्यात आले.

या उल्लेखनीय यशाबद्दल पंचायत समितीचे पदाधिकारी, जिल्हा परिषद व पंचायत समिती सदस्य, शिक्षण विभाग, लोकप्रतिनिधी आणि ग्रामस्थांनी तिन्ही शाळा व पाटण तालुका शिक्षण विभागाचे अभिनंदन केले आहे. अधिकारी, शिक्षक, पालक आणि ग्रामस्थ यांच्या सामूहिक प्रयत्नांतून मिळालेले हे यश राज्यातील आणि देशातील इतर शाळांसाठी प्रेरणादायी ठरणार आहे.