Satara,Maharashtra,India

'कॉक्रोच' चा मोर्चा आता शाळांकडे

छ. संभाजीनगर : पेपरफुटीवरून दिल्लीतील जंतरमंतरवर विद्यार्थ्यांच्या आंदोलनाचं नेतृत्व करणाऱ्या अभिजित दिपकेंनी आता नवीन मोहिमेची घोषणा केलीय.सरकारी आणि खासगी शाळा आता दिपकेंच्या रडारवर आहेत.

देश स्वातंत्र्याचं 80 वं वर्ष साजरी करत असलं तरी ग्रामीण भागातील सरकारी शाळांची अवस्था मात्र अजूनही दयनीयच आहे.त्यामुळे दिवसेंदिवस विद्यार्थ्यांची संख्याही घटत असल्याचं विदारक वास्तव वारंवार समोर आलयं. त्यामुळे CJPचे संस्थापक अभिजित दिपकेंनी नीट पेपरफुटीनंतर आता आपला मोर्चा थेट सरकारी शाळांकडे वळवलाय. विद्यार्थ्यांच्या मूलभूत सुविधांसाठी 15 ऑगस्टपासून विशेष मोहीम सुरू करण्याची मोठी घोषणा अभिजीत दिपकेंनी केलीय. यावेळी त्य़ांनी नवी संसद आणि पंतप्रधानांच्या निवासस्थानावरून भाजपवर निशाणा साधलाय.

फक्त सरकारी शाळाचं नव्हे तर CJP खासगी शाळांच्या मनमानी कारभाराविरोधातही मैदानात उतरण्याच्या तयारीत आहे. पहिली आणि दुसरीच्या विद्यार्थ्यांसाठी लाखो रुपयांची फी कशी असू शकते असा सवालही दिपकेंनी उपस्थित केलीय. एकिकडे सरकारी शाळांमधील शिक्षणाच्या दर्जावर नेहमीच प्रश्नचिन्ह उपस्थित केलं जातं.

त्यामुळेच पालक खासगी शाळांक़डे धावतात. मात्र याचाच फायदा उचलत खासगी इंग्रजी शाळा पालकांची सर्रास लूट करतात. सरकार केवळ कारवाईबाबत आश्वासनाच्या डरकाळ्या फोडत असतं. त्यामुळे खासगी शाळांना शह देण्यासाठी सरकारी शाळांचा दर्जा सुधारणं हा एकमेव पर्याय आहे. आणि त्यालाच दिपकेंनी हात घातल्यामुळे आता ही मोहीम जोर धरणार का? सरकार याबाबत गंभीर पावलं उचलणार का? सीजेपीच्या याही आंदोलनाला यश मिळणार का? अशा अनेक प्रश्नांच्या उत्तराकडे राज्यातील जनतेचं लक्ष लागलंय.